Kryetari i Parlamentit të Iranit, Mohammad Bagher Ghalibaf, ka hedhur poshtë me ironi pretendimet e Sekretarit të Thesarit të SHBA-së, Scott Bessent, sipas të cilit masat ekonomike dhe bllokada amerikane do të shkatërrojnë ekonominë iraniane.
Përmes një postimi në rrjetin social X, Ghalibaf iu përgjigj deklaratës së Bessent se Uashingtoni kishte hedhur 130 milionë fuçi naftë në treg gjatë dy javëve të fundit për të ulur çmimet.
“Gënjeshtar, gënjeshtar, pantallonat e ndezura flakë,” shkroi zyrtari i lartë iranian.
Ghalibaf i bëri thirrje zyrtarit amerikan të rishikojë shifrat e agjencisë Moody’s, duke pretenduar se “shifrat e vërteta 130” tregojnë mbi 130 miliardë dollarë kosto të SHBA-së lidhur me luftën. Ai shtoi gjithashtu se firma tregtare amerikane Jane Street ka humbur mbi 130 milionë dollarë duke vënë bast për rënien e çmimeve të naftës.
“Gënjeshtar, gënjeshtar, rendimentet në flakë,” shtoi Ghalibaf, duke shpërndarë edhe një artikull të ekonomistit Paul Krugman që kritikonte qëndrimet e Bessent.
Tensionet mes Teheranit dhe Uashingtonit mbeten të larta që nga shpërthimi i sulmeve reciproke në fund të shkurtit. Edhe pse në qershor u nënshkrua një memorandum mirëkuptimi në Islamabad me ndërmjetësimin e Pakistanit dhe Katarit, zbatimi i tij ka ngecur, me Iranin që akuzon SHBA-në për mospërmbushje të zotimeve. /mesazhi
