Kryeministri Albin Kurti ka takuar ambasadorin amerikan, Jeffrey Hovenier, dhe Drejtoreshën për Çështje të Evropës Qendrore dhe Jugore në Departamentin e Shtetit Amerikan, Collen Hyland, të premten.
Ata kanë diskutuar për marrëdhëniet dypalëshe dhe ngjarjet e sivjetme, një prej të cilave përmendën çështjen e procesit të konvertimit të targave në RKS.
Kurti e ka cilësuar vitin 2023 si sfidues, posaçërisht për sigurinë.
“Vit ky që krahas zhvillimit dhe progresit ishte vit sfidues veçanërisht në aspektin e sigurisë për shkak të sjelljes agresive të Serbisë ndaj Kosovës dhe strukturave kriminale të saj, që u përcoll me tensione, sulme ndaj pjesëtarëve të KFOR-it, institucioneve vendore e të gazetarëve në katër komuna në veri, rrëmbimin e tre policëve të Kosovës brenda territorit tonë, dhe sulmi terrorist e paramilitar i 24 shtatorit në Banjskë të Zveçanit ku mbeti i vrarë rreshteri i policor, tani Heroi i Kosovës, Afrim Bunjaku”, thuhet në komunikatën e Kryeministrisë.
Pas takimit me Hovenierin dhe Hyland, Kurti priti edhe Ambasadorin e Francës në Kosovë, Olivier Guerot.
Ata folën rreth nismave dhe bashkëpunimeve të mundshme në fushën e arsimit e teknologjisë së informacionit bazuar në përvojat e shtetit francez, si dhe për mundësitë që ofron Kosova dhe planet në zbatim të Qeverisë në sektorin e energjisë, përkatësisht në atë të burimeve të ripërtëritshme të energjisë.
Kryeministri po ashtu takoi Përfaqësuesin e Norvegjisë për Ballkanin Perëndimor, Haakon Blankenborg, t⌂ cilit i tha se pas sulmit terrorist e paramilitar, të sponsorizuar nga Serbia, është e rëndësishme që të shtohet siguria në kufirin me Serbinë.
