Udhëheqësi i opozitës izraelite, Yair Lapid, ka kërkuar nga qeveria që të ndalojë luftën në Rripin e Gazës dhe të negociojë një marrëveshje me fraksionet palestineze për të siguruar kthimin e pengjeve, transmeton Anadolu.
“Ne duhet të ndalojmë luftën, të arrijmë një marrëveshje dhe t’i sjellim pengjet në shtëpi. Izraeli ka kundërshtuar gjithmonë luftërat e zgjatura dhe ushtria jonë, e cila mbështetet në forcat rezervë, nuk është e pajisur për këtë lloj lufte”, tha Lapid për Radion e Ushtrisë.
Për javë të tëra, dhjetëra mijëra izraelitë kanë protestuar në Tel Aviv dhe qytete të tjera, duke bërë thirrje për një marrëveshje shkëmbimi pengjesh dhe zgjedhje të parakohshme.
Dje, gazeta izraelite ‘Yedioth Ahronoth’, duke cituar burime të paidentifikuara, raportoi se delegacioni negociator do të niset të hënën për të vazhduar diskutimet mbi marrëveshjen.
Sipas raporteve zyrtare izraelite, negociatat indirekte kanë rifilluar midis Tel Avivit dhe Hamasit për të arritur një marrëveshje për shkëmbimin e pengjeve izraelite dhe palestineze, si dhe për një armëpushim në Gaza.
Për muaj të tërë, përpjekjet ndërmjetësuese nga SHBA-ja, Katari dhe Egjipti kanë synuar të sigurojnë një marrëveshje midis Izraelit dhe Hamasit për një shkëmbim pengjesh dhe një armëpushim, duke lehtësuar hyrjen e ndihmave humanitare në Rripin e Gazës.
Megjithatë, këto përpjekje kanë ngecur për shkak të refuzimit të kryeministrit izraelit, Benjamin Netanyahu, për të përmbushur kërkesat e Hamasit për të ndalur luftën.
Duke shkelur një rezolutë të Këshillit të Sigurimit të OKB-së që kërkon një armëpushim të menjëhershëm, Izraeli është përballur me reagimin ndërkombëtar në mes të ofensivës brutale të vazhdueshme në Gaza që nga sulmi i 7 tetorit nga grupi palestinez Hamas.
Më shumë se 38 mijë palestinezë janë vrarë që atëherë, kryesisht gra dhe fëmijë, si dhe mbi 87 mijë të tjerë janë plagosur. Pothuajse nëntë muaj pas luftës izraelite, pjesë të mëdha të Gazës janë kthyer në rrënoja mes një bllokade gjymtuese të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë, vendimi i fundit i së cilës e urdhëroi Tel Avivin të ndalojë menjëherë operacionin ushtarak në qytetin jugor Rafah, ku mbi 1 milion palestinezë kanë kërkuar strehim nga lufta përpara se qyteti të pushtohej më 6 maj.