Niveli i ujit të lumit Danub ka rënë ndjeshëm, duke e bërë lundrimin pothuajse të pamundur në pjesën bullgare të lumit, raportoi agjencia e lajmeve BTA, transmeton Anadolu.
Ivelin Zanev, drejtor ekzekutiv i Agjencisë Ekzekutive për Eksplorimin dhe Mirëmbajtjen e Lumit Danub, tha se niveli i ujit përgjatë pjesës bullgare të lumit ishte 1,80 metra nën nivelin minimal të lundrimit.
Ai theksoi se niveli i ulët i ujit e ka bërë pothuajse të pamundur lundrimin përgjatë pjesës bullgare të lumit.
“Gjatë 24 orëve të fundit, niveli i ujit të Danubit ka mbetur i pandryshuar në stacionet matëse pranë Ruses dhe Silistrës”, tha Zanev.
Ndërkohë, në Novo Selo, Vidin, Lom, Oryahovo, Nikopol dhe Svishtov, nivelet e ujit ranë nga 1 deri në 2 centimetra.
Drejtoria e Mbikëqyrjes së Lumit në Ruse tha se gjatë 24 orëve të fundit asnjë anije nuk ka ngecur as brenda, as jashtë kanalit të lundrimit.
Kufizimet për zhytjen e anijeve në ujë mbeten në fuqi përgjatë gjithë pjesës bullgare të lumit për shkak të kushteve të vështira hidrologjike.
Të premten, niveli i Danubit në Ruse ishte 125 centimetra nën nivelin referues zero dhe parashikohet të bjerë edhe me 3 centimetra gjatë dy ditëve të ardhshme.
