Në një intervistë për Euractiv, ambasadori italian në Serbi, H.E. Luca Gori, foli për aspektet e marrëdhënieve serbo-italiane, duke përfshirë rritjen e pranisë italiane dhe fokusin e saj në rajonin e Ballkanit Perëndimor.
Në lidhje me këtë çështje të fundit, ambasadori Gori tha se “Italia gjithmonë e ka parë Serbinë dhe Ballkanin si një rajon strategjik dhe së bashku me Beogradin, po trajtojmë disa sfida të përbashkëta thelbësore. Paqja dhe qëndrueshmëria në rajon, flukset e emigracionit, rritja dhe zhvillimi ekonomik, risitë teknologjike: këto janë fushat ku Italia dhe Serbia po bashkëpunojnë.
Për sa i përket situatës së sigurisë në zonë, ai vuri në dukje se “Siguria e Ballkanit Perëndimor është me rëndësi thelbësore. Italia është veçanërisht e angazhuar në Kosovë me KFOR-in. Duke pasur parasysh tensionet e tanishme, është thelbësore që të punohet për zbutjen e tensioneve dhe BE-ja ka propozuar një plan.
Beogradi dhe Prishtina duhet të rikthehen në tryezën e bisedimeve për të zbatuar marrëveshjet e fundit të arritura në Bruksel në shkurt dhe në Ohër në mars, duke nisur me krijimin e Asociacionit të Komunave Serbe”.
Një nga segmentet e bashkëpunimit që po zhvillohet në dekadën e fundit, është bashkëpunimi ekonomik mes dy vendeve, ku Italia, sipas ambasadorit, është “një nga partnerët më të mëdhenj tregtarë dhe ekonomikë të Serbisë.
Sipas të dhënave të vitit 2022, tani në Serbi janë të regjistruara rreth 1.200 kompani italiane, të cilat kanë krijuar deri në 50.000 vende pune.
Në të njëjtin vit, tregtia jonë dypalëshe arriti një rekord prej 4,6 miliardë eurosh (+10,5% krahasuar me 2021), ku 2,58 miliardë euro ishin eksporte italiane (6,6% të importit total të Serbisë) dhe rreth 2 miliardë euro ishin importe italiane (8,4% e eksportit total të Serbisë).
Italia është tani partneri tregtar i tretë më i madh i Serbisë, siç u konfirmua edhe në tremujorin e parë të vitit 2023, kur arritëm vlerën 1.45 miliardë euro në tregtinë dypalëshe. Kompanitë italiane kontribuojnë në mbi 5% të PBB-së së Serbisë.
Duke komentuar në forumin e fundit italo-serb të biznesit dhe shkencës, ambasadori tha se “vizioni ynë është të zhvillojmë një strategji organike dhe të vendosim bashkëpunimin ekonomik në qendër të pranisë italiane në Serbi dhe në Ballkanin Perëndimor.
Me këtë rast, sollëm në Beograd 150 kompani italiane. Ne organizuam 450 takime B2B dhe nënshkruam 13 marrëveshje.
Synimi ynë është të rinovojmë praninë ekonomike në Serbi duke u përqendruar në mundësitë e ofruara nga disa sektorë strategjikë me një komponent më të rëndësishëm teknologjik: tranzicioni i gjelbër dhe energjetik, bujqësia dhe agroteknologjia e qëndrueshme, infrastruktura dhe bashkëpunimi shkencor.
Ai shtoi se disa organizata italiane biznesi/tregtare, si Credit Export Agencies, Cassa Depositi e Prestiti, SACE dhe SIMEST, do të ofrojnë instrumente financimi për të mbështetur ndërkombëtarizimin e kompanive italiane në Serbi. /monitor
