Institucionet e të burgosurve palestinezë kanë bërë të ditur se numri i të burgosurve palestinezë dhe arabë në burgjet izraelite ka tejkaluar 9600 deri në fillim të muajit prill 2026, duke shënuar një rritje prej 83% krahasuar me periudhën para luftës.
Sipas një deklarate të publikuar me rastin e Ditës së të Burgosurit Palestinez, në mesin e të burgosurve janë 86 gra, përfshirë dy të ndaluara para fillimit të konfliktit dhe 25 të mbajtura në paraburgim administrativ. Po ashtu, rreth 350 fëmijë ndodhen në burgje, kryesisht në “Ofer” dhe “Megiddo”, si dhe dy vajza në burgun “Damon”.
Deklarata thekson se numri i të ndaluarve administrativë është rritur ndjeshëm, duke arritur në mbi 3532 persona, krahasuar me rreth 1320 para luftës. Shumica e tyre janë ish-të burgosur, por përfshijnë edhe studentë, gazetarë, aktivistë dhe përfaqësues politikë.
Ndërkohë, 1251 persona janë klasifikuar si “luftëtarë të paligjshëm”, një kategori që nuk përfshin të ndaluarit në kampet ushtarake. Kjo do të thotë se rreth gjysma e të burgosurve mbahen pa akuza apo gjykim.
Institucionet raportojnë gjithashtu për përkeqësim të gjendjes shëndetësore të të burgosurve, me shumë prej tyre që vuajnë nga sëmundje të ndryshme si pasojë e kushteve të vështira dhe mungesës së trajtimit mjekësor.
Që nga viti 1967, 326 të burgosur kanë humbur jetën në burgje, ndërsa 89 prej tyre kanë vdekur pas fillimit të konfliktit të fundit. Po ashtu, dhjetëra trupa të të ndaluarve nga Gaza mbeten të zhdukur me forcë.
Sipas të njëjtave burime, aktualisht mbahen 97 trupa të të burgosurve të vdekur, krahasuar me 11 para luftës, duke reflektuar një rritje të konsiderueshme të këtij numri. /mesazhi
