Pjesëtarët e batalionit të artilerisë së Armatës së Republikës së Maqedonisë së Veriut (ARM) kanë shënuar 8 shtatorit, 33-vjetorin e pavarësisë së vendit, me gjuajtjen e dhjetë breshërive të artilerisë nga kazerma “Ilinden” në kryeqytetin Shkup, transmeton Anadolu.
Sonte, me qitjet artilerike nga kazerma e Shkupit u shënua fillimi i ngjarjeve festive kushtuar Pavarësisë së Maqedonisë së Veriut.
Gjatë ditës së nesërme, ndër disa ngjarje kushtuar 8 shtator të organizuara në nivel lokal, si dhe nga shoqata të ndryshme, ngjarja qendrore do të organizohet nga qeveria e vendit, ku do të interpretohen vepra të autorëve maqedonas lidhur me këtë temë dhe një videoklip i përgatitur me materiale arkivore nga referendumi i vitit 1991.
Nën sloganin “Së bashku luftojmë, së bashku do t’ia dalim”, qeveria e Maqedonisë së Veriut organizon programin festiv në goditën e Filarmonisë së Maqedonisë në Shkup, ku është paralajmëruar edhe adresimi i kryeministrit Hristijan Mickoski.
Më 8 shtator të vitit 1991, vendi organizoi referendum për pavarësi nga Republika Socialiste Federative e Jugosllavisë (RFSJ), ku mbi 95 për qind e qytetarëve që votuan në referendum u deklaruan për shtet të pavarur dhe sovran.
