Gjykata franceze dënon Tariq Ramadan me 18 vjet burg në mungesë, ai mohon akuzat dhe kërkon rigjykim
Një gjykatë në Paris ka dënuar studiuesin e njohur islamik Tariq Ramadan me 18 vjet burg për përdhunimin e tre grave, në një çështje që ka tërhequr vëmendje të madhe publike që nga shpërthimi i saj në vitin 2017 gjatë lëvizjes #MeToo.
Ramadan, 63 vjeç, nuk ishte i pranishëm në gjyq për shkak të problemeve shëndetësore dhe ndodhet aktualisht në Gjenevë, ku po trajtohet për sëmundjen. Gjykata ka lëshuar një urdhër arresti ndaj tij dhe ka vendosur gjithashtu një ndalim të përhershëm hyrjeje në Francë.
Gjykatësja e çështjes theksoi “seriozitetin ekstrem të akteve”, duke nënvizuar se pëlqimi për marrëdhënie seksuale nuk nënkupton pëlqim për çdo veprim.
Nga ana tjetër, Ramadan ka mohuar vazhdimisht të gjitha akuzat. Në një reagim për mediat franceze, ai e cilësoi vendimin si të padrejtë dhe kërkoi një rigjykim, duke insistuar se mungesa e tij në gjykatë lidhej vetëm me gjendjen shëndetësore.
Avokatët e tij kanë kritikuar procesin gjyqësor, duke e përshkruar si të njëanshëm, ndërsa vetë Ramadan ka deklaruar më herët se është objekt i një fushate politike dhe mediatike kundër tij.
Rasti në Francë pason një dënim të mëparshëm në Zvicër për një çështje të veçantë, ndërsa ai vazhdon t’i kundërshtojë të gjitha akuzat në rrugë ligjore.
Ndërkohë, një nga gratë që ngriti akuzat se vendimi përfaqëson një moment drejtësie pas viteve të gjata përpjekjesh.
Çështja mbetet e diskutueshme, me qëndrime të forta si nga mbështetësit e viktimave, ashtu edhe nga ata që kërkojnë rishqyrtim të procesit dhe provave. /mesazhi
