Ministri për Evropën dhe Punët Jashtme i Shqipërisë, Ferit Hoxha, theksoi se vendi i tij mbështet fuqishëm sovranitetin, integritetin territorial dhe karakterin multietnik të Bosnjë e Hercegovinës, transmeton Anadolu.
Në një postim në rrjetin social amerikan X, Hoxha bëri të ditur se në kuadër të Forumit të Diplomacisë në Antalya (ADF 2026), ka zhvilluar takim me Përfaqësuesin e Lartë për Bosnjë e Hercegovinën, Hans Christian Friedrich Schmidt.
“Qëndrimi i Shqipërisë ndaj BeH-së mbetet i qartë dhe i palëkundur: ne mbështesim fuqimisht sovranitetin, integritetin territorial dhe karakterin e saj multietnik”, ka shkruar Hoxha.
Ai theksoi se roli i Zyrës së Përfaqësuesit të Lartë mbetet thelbësor për ruajtjen e stabilitetit dhe për zbatimin e plotë të Marrëveshjes së Paqes së Dejtonit.
Sipas Hoxhës, paqja, siguria dhe stabiliteti në Bosnjë e Hercegovinë janë me rëndësi jo vetëm për të ardhmen e vendit, por edhe për stabilitetin dhe prosperitetin e rajonit të Ballkanit Perëndimor dhe të gjithë Evropës.
