Zëvendëskryeministri dhe ministri i Punëve të Jashtme i Malit të Zi, Ervin Ibrahimoviq tha se ata do të vazhdojnë përpjekjet e tyre për të forcuar marrëdhëniet e mira me Turqinë.
Ibrahimoviq, i cili erdhi në Antalya për të marrë pjesë në Forumin e 5-të të Diplomacisë në Antalya (ADF), iu përgjigj pyetjeve të Anadolu-s.
Ai theksoi se Mali i Zi ka marrëdhënie shumë të mira dhe të vazhdueshme me Turqinë. “Mund të them se këto marrëdhënie të mira reflektohen në të gjitha fushat. Në dritën e besimit dhe bashkëpunimit të ndërsjellë, marrëdhëniet midis Malit të Zi dhe Turqisë po zhvillohen më tej çdo ditë. Shpresojmë që brezat e ardhshëm do ta vazhdojnë këtë”, tha Ibrahimoviq.
Kryediplomati malazez shtoi se marrëdhëniet e ndërsjella po zhvillohen në bazë të dialogut të mirë politik. “Ne do të vazhdojmë përpjekjet tona për të forcuar marrëdhëniet tona të mira. Kjo nuk është rastësi. Në fushën ekonomike, veçanërisht në aspektin e investimeve direkte, Turqia renditet e para në Mal të Zi”, tha ai.
Ibrahimoviq tha se vëllimi i tregtisë së jashtme me Turqinë mbetet në nivel të lartë, duke shtuar se ata vazhdojnë bashkëpunimin në të gjitha fushat dhe se besimi i ndërsjellë është zhvilluar jo brenda natës, por si rezultat i shumë viteve.
Duke kujtuar se më shumë se 250 mijë malazezë jetojnë në Turqi, Ibrahimoviq tha: “Kontributi i kësaj diaspore në zhvillimin e marrëdhënieve të mira është mjaft domethënës. E kemi parë këtë veçanërisht në fushën ekonomike kohët e fundit”.
– “ADF ofron mundësi për të bashkuar udhëheqësit e vendeve”
Duke theksuar se ADF është organizatë jashtëzakonisht prestigjioze, Ibrahimoviq tha: “Do të doja të thoja se ata që nuk janë këtu sot po humbasin shumë. ADF ofron mundësi të jashtëzakonshme për udhëheqësit e vendeve që të bashkohen”.
Ai potencoi se ADF është platformë e jashtëzakonshme për adresimin e çështjeve globale dhe rajonale. “ADF ofron hapësirë ku mund t’u përgjigjemi të gjitha pyetjeve gjeopolitike që mund të bëhen”, u shpreh Ibrahimoviq.
