Një mision i OKB-së për gjetjen e fakteve zbuloi sot se SHBA-ja ka kryer “krime lufte” gjatë sulmeve ajrore ndaj Iranit, duke shkaktuar vdekjen e civilëve, lëndime dhe dëmtime të objekteve civile në Iran, transmeton Anadolu.
Misioni i Pavarur Ndërkombëtar për Gjetjen e Fakteve mbi Iranin lëshoi një raport, duke gjetur baza të arsyeshme për të besuar se SHBA-ja ka kryer krime lufte “gjatë një palë sulmesh ajrore që vranë të paktën 178 civilë, përfshirë gra dhe fëmijë”.
Misioni thekson se “krimet e luftës përfshijnë nisjen e sulmeve pa dallim që rezultuan në humbjen e jetëve, plagosjen e civilëve ose dëmtimin e objekteve civile”, gjatë sulmeve të SHBA-së dhe Izraelit në shkurt.
Sulmet e cituara përfshijnë sulme me raketa “Tomahawk” në një shkollë fillore në Minab, të cilat vranë mbi 150 persona dhe një tjetër sulm ajror ku raketat e goditjes precize shpërndanë retë e grimcave të tungsteni mbi një kompleks sportiv dhe zonë banimi në Lamerd, duke vrarë 22 civilë.
“Civilët në Iran janë të zënë midis shkeljeve të rënda të të drejtave të njeriut dhe krimeve kundër njerëzimit të kryera nga qeveria e tyre dhe konfliktit vdekjeprurës të vendit me SHBA-në dhe Izraelin”, tha misioni.
Raporti arriti në përfundimin se “shtypja e dhunshme e protestave të viteve 2025-2026 nga qeveria iraniane shënoi një përshkallëzim të paprecedentë nga goditjet e kaluara, të shënuara nga përdorimi i gjerë i forcës vdekjeprurëse që rezultoi në vrasje dhe plagosje masive si dhe arrestime të gjera”.
Ai kritikoi vendosjen nga qeveria të një ndërprerjeje të internetit dhe komunikimeve në të gjithë vendin në janar, gjatë kulmit të protestave. Misioni “i kërkoi Iranit dhe SHBA-së të ndërpresin menjëherë të gjitha shkeljet dhe krimet, të ofrojnë dëmshpërblime të plota për viktimat dhe të garantojnë mospërsëritjen”.
Gjithashtu misioni bëri thirrje për një “fund të menjëhershëm të armiqësive, veprime të rinovuara diplomatike nga të gjitha vendet anëtare për paqe të përhershme dhe llogaridhënie të shteteve të treta përmes juridiksionit universal”.
