RTV AHIRETI
FeaturedKosovëLajmeLajmet

Në Speciale paraqitet dëshmitari i parë kundër Pjetër Shalës

ne-speciale-paraqitet-deshmitari-i-pare-kunder-pjeter-shales

Dëshmitari i parë i prokurorisë, në rastin kundër Pjetër Shalës, do të paraqitet sot para Dhomave të Specializuara në Hagë.

Me të fillon edhe paraqitja e provave nga Zyra e Prokurorit të Specializuar e cila e bën përgjegjës ish-pjesëtarin e Ushtrisë Çlirimtare të Kosovës për ndalim arbitrar, trajtim mizor, torturë e vrasje të paligjshme.

Krejt këto prokuroria pretendon se kanë ndodhur në periudhën maj-qershor të vitit 1999 në ish-Fabrikën e Metalit në Kukës.

Sipas ZPS-së, Shala ngarkohet edhe si kryes fizik lidhur me krimet e ndalimit arbitrar, trajtimit mizor dhe torturës.

Këto pretendime janë kundërshtuar nga mbrojtja e Pjetër Shalës duke deklaruar se kjo çështje është e mbështetur në thashetheme.

Gjatë deklaratës hyrëse të tij, avokati kishte thënë se i akuzuari nuk ka qenë asnjëherë në dijeni për ekzistencën e ndonjë qendre të ndalimit në ish-Fabrikën e Metalit në Kukës.

Edhe Pjetër Shala ishte deklaruar pa betim në fillim të këtij procesi gjyqësor duke thënë se është plotësisht i pafajshëm.

Ai kishte theksuar se ka luftuar kundër një makinerie ushtarake e policore të regjimit kriminal të Millosheviqit dhe asnjëherë kundër civilëve.

Ish-pjesëtari i Ushtrisë Çlirimtare të Kosovës kishte thënë se nëse ka drejtësi në Gjykatën Speciale ai do të shpallet i pafajshëm.

Në këtë çështje gjyqësore do të zhvillohen seanca gjatë tërë javës ndërsa do të vazhdojnë javën e parë dhe të fundit të muajit maj.

Pjetër Shala po mbahet në qendrën e paraburgimit në Hagë prej marsit të vitit 2021.

Sipas Speciales “Krimet për të cilat akuzohet z.Shala u kryen përafërsisht midis 17 majit 1999 dhe 5 qershorit 1999 kundër personave që u mbajtën të ndaluar në fabrikën e metalit në Kukës(Shqipëri), që pretendohet se përdorej prej Ushtrisë Çlirimtare të Kosovës”.

Pjetër Shala u arrestua më 16 mars 2021 nga autoritetet belge dhe u transferua në Hagë më 15 prill të atij viti, në bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës.

Related posts

Nigeri, 20 milionë fëmijë që nuk mund të shkojnë në shkollë mund të kërcënojnë sigurinë në të ardhmen

admin

Aksident trafiku në Prishtinë, lëndohen gjashtë persona

RTI

Zgjedhjet e përgjithshme/ PDK pritet të prezantojë sot kandidatin për të zëvendësuar Kurtin

admin