Kryeministri izraelit, Benjamin Netanyahu, deklaroi se 38 ndërtesa që u përkasin palestinezëve në Bregun Perëndimor të pushtuar u boshatisën këtë muaj me arsyetimin se ishin “të palicensuara”, transmeton Anadolu Agency (AA).
Netanyahu bëri një deklaratë në llogarinë e tij në Twitter në lidhje me strukturat që u përkasin palestinezëve, të boshatisura nga forcat izraelite.
Duke akuzuar palestinezët për “krijimin e vendbanimeve të paligjshme”, Netanyahu tha: “Forcat e sigurisë kanë evakuuar 38 struktura ilegale që u përkasin palestinezëve që nga fillimi i muajit”.
Deklarata e Netanyahu-t erdhi pas reagimit të disa ministrave ekstremistë të kabinetit për boshatisjen e një vendbanimi hebre.
Ministrat nga Partia e Sionizmit Fetar të udhëhequr nga Bezalel Smotrich nuk morën pjesë në mbledhjen e kabinetit të së dielës në përgjigje të boshatisjes së vendbanimit “Or Hayim” të ndërtuar nga kolonët hebrenj në veri të Bregut Perëndimor të pushtuar.
Ministri i Sigurisë Kombëtare i ekstremit të djathtë, Itamar Ben-Gvir, në mbledhjen e kabinetit gjithashtu reagoi ndaj prishjes së vendbanimit hebre, duke kërkuar “të prishen më shumë shtëpi arabe”.
Prishja e shtëpive palestineze me arsyetimin se ato janë “të palicensuara”
Ndërsa Izraeli shkatërron shtëpitë dhe strukturat palestineze në Kudsin Lindor dhe Bregun Perëndimor, të cilat i pushtoi në vitin 1967, me arsyetimin se ato janë “të palicensuara”, përpjekjet e palestinezëve për të marrë leje shpesh dështojnë për shkak të praktikave penguese të autoriteteve izraelite.
Prishja e shtëpive palestineze bëhet në zonën “C” të Bregut Perëndimor të pushtuar, e cila kryesisht është nën kontrollin e autoriteteve izraelite.
Në kuadrin e “Marrëveshjes së Dytë të Oslos” të nënshkruar midis Palestinës dhe Izraelit në 1995, Bregu Perëndimor i pushtuar u nda në zonat A, B dhe C.
Administrimi i “zonës A”, e cila mbulon 18 për qind të Bregut Perëndimor, iu transferua Palestinës në aspektin administrativ dhe të sigurisë, kontrolli adminstrativ i “zonës B” që mbulon 21 për qind iu transferua Palestinës dhe siguria e saj iu transferua Izraelit, ndërkaq, administrimi dhe siguria e “zonës C”, e cila mbulon 61 për qind të Bregut Perëndimor, iu lanë Izraelit.
