Përpara ndeshjes kualifikuese të Euro 2025 për femra mes Skocisë dhe Izraelit në stadiumin Hampden të Glasgout, një demonstrues u lidh me zinxhirë në shtyllën e portës për të protestuar kundër operacionit ushtarak të Izraelit në Gaza, transmeton Anadolu.
Atmosfera rreth ndeshjes Skoci-Izrael, e cila u mbajt me dyer të mbyllura për shkak të shqetësimeve të sigurisë, u ndërpre kur një 19-vjeçar u lidh me zinxhirë në shtyllën e portës dhe protestoi kundër sulmeve të vazhdueshme ushtarake të Izraelit në Gaza, raportoi STV News.
Kur loja rifilloi, gjesti i skuadrës izraelite për të mbajtur lart bluzat që mbrojnë lirimin e pengjeve të mbajtura nga Hamasi i shtoi një shtresë tjetër kompleksiteti ndeshjes.
Ndërkohë, qindra njerëz u mblodhën jashtë stadiumit, duke mbajtur flamuj palestinezë dhe arkivole simbolike, duke reflektuar një protestë më të madhe publike kundër situatës në Gaza.
Pavarësisht trazirës, loja përfundimisht vazhdoi 45 minuta më vonë, por jo pa jehonën e mospajtimit që kumboi si nga demonstruesit, ashtu edhe nga kundërprotestuesit.
“Mendoj se është burracakëri që na kanë mbajtur jashtë stadiumit tonë kombëtar”, citoi transmetuesi të kenë thënë demonstruesit.
“Na kanë mbyllur gojën, si tifozë dhe si protestues”, kanë reaguar ata.
STV News citoi protestuesit duke bërë thirrje: “Ne duhet të jemi atje duke bërë zhurmë para televizorit; në vend të kësaj, ata po na mbajnë jashtë dhe të heshtur”.
“Vendimi për të luajtur lojën në një stadium të zbrazët u mor pas inteligjencës së përditësuar dhe ‘konsultimeve të gjera të sigurisë’ me palët kyçe të përfshira”, tha transmetuesi, duke cituar një deklaratë të lëshuar nga Federata Skoceze e Futbollit (SFA).
“Për shkak të inteligjencës së përditësuar dhe pas konsultimeve të gjera të sigurisë me të gjitha palët kyçe, SFA-ja me keqardhje konfirmon se ndeshja e ardhshme kualifikuese mes Skocisë dhe Izraelit në Hampden Park më 31 maj do të luhet me dyer të mbyllura”, ka theksuar SFA-ja.
“Ekipi i operacioneve të stadiumit u alarmua për mundësinë e ndërprerjeve të planifikuara në ndeshje dhe si pasojë ne nuk kemi zgjidhje tjetër veçse ta luajmë ndeshjen pa praninë e tifozëve”, kishte deklaruar federata.
“Kërkojmë falje për çdo shqetësim të shkaktuar nga vendimi, por siguria e tifozëve, lojtarëve, stafit të ekipit dhe zyrtarëve është e një rëndësie të madhe”, thuhej më tej.
Izraeli ka vazhduar ofensivën e tij brutale në Gaza që nga sulmi i Hamasit më 7 tetor, pavarësisht nga një rezolutë e Këshillit të Sigurimit të OKB-së që kërkon një armëpushim të menjëhershëm.
Rreth 36.400 palestinezë janë vrarë që atëherë në Gaza, shumica dërrmuese gra dhe fëmijë, dhe mbi 82.000 të tjerë janë plagosur, sipas autoriteteve lokale shëndetësore.
Gati tetë muaj pas fillimit të luftës izraelite, zona të gjera të Gazës janë shndërruar në rrënoja, krahas një bllokade gjymtuese të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë, e cila në vendimin e saj të fundit e urdhëroi atë të ndalonte menjëherë operacionin e tij në Rafah, ku mbi një milion palestinezë kishin kërkuar strehim nga lufta përpara se të pushtohej.
