Një delegacion nga grupi palestinez Hamas pritet nesër të vizitojë Kajron për të diskutuar mbi përpjekjet për armëpushim, transmeton Anadolu.
Kanali shtetëror i Egjiptit Al-Qahera News citoi një burim të lartë dhe të informuar egjiptian që tha se Egjipti do të presë një delegacion nga Hamasi nesër për të diskutuar propozimin e armëpushimit.
Megjithatë, kanali i lajmeve nuk dha detaje të tjera.
Egjipti konfirmoi të hënën se ka një propozim të ri për një armëpushim në Rripin e Gazës.
“Ka një propozim në tryezë për të arritur një armëpushim në Gaza”, tha ministri i Jashtëm egjiptian Sameh Shoukry gjatë një takimi të Forumit Ekonomik Botëror në Arabinë Saudite.
Hamasi vlerësohet të ketë më shumë se 130 pengje izraelite, ndërsa Tel Avivi mban mbi 9.100 palestinezë në burgjet e tij.
Hamasi kërkon fundin e ofensivës vdekjeprurëse të Izraelit në Rripin e Gazës dhe tërheqjen e forcave izraelite nga territori për çdo marrëveshje shkëmbimi pengjesh me Tel Avivin.
Gjatë marrëveshjes së mëparshme në nëntor 2023 u liruan 81 izraelitë dhe 24 të huaj në këmbim të 240 palestinezëve, përfshirë 71 gra dhe 169 fëmijë.
Izraeli ka kryer një ofensivë brutale në enklavën palestinezë që nga sulmi ndërkufitar i Hamasit më 7 tetor të vitit të kaluar, për të cilin Tel Avivi thotë se u vranë afër 1.200 njerëz.
Që atëherë, të paktën 34.600 palestinezë janë vrarë në Rripin e Gazës, kryesisht gra dhe fëmijë, si dhe mbi 77.800 të tjerë janë plagosur në mes të shkatërrimit në masë dhe mungesës së madhe të nevojave.
Më shumë se gjashtë muaj pas luftës izraelite, zona të gjera të Gazës janë kthyer në gërmadha, sipas OKB-së, duke çuar në zhvendosjen e brendshme të 85 për qind të popullsisë së enklavës mes një bllokade të ushqimit, ujit të pastër dhe ilaçeve.
