Një grua shtatzënë ka raportuar se si shkak i neglizhencës së mjekëve në Qendrën Klinike Universitare të Kosovës, i ka humbur dy foshnjat e saj.
Telegrafi mëson se gruaja ka qenë në javën e 21-të të shtatzënisë, ndërsa ngjarja ka ndodhur të dielën.
E lidhur me rastin Prokuroria Themelore në Prishtinë ka nisur hetimet.
Laureta Ulaj, zëdhënëse e kësaj prokurorie ka konfirmuar për Telegrafin se Prokurori i Shtetit ka lëshuar urdhëresë për t’iu bërë autopsia dy foshnjave të pajeta.
Ulaj ka deklaruar se rasti është iniciuar “Trajtim i pandërgjegjshëm mjekësor”.
“Prokuroria në koordinim me institucionet relevante janë duke i ndërmarrë veprimet hetimore për ta ndriçuar në plotëni këtë rast”, ka thënë ajo.
Telegrafi ka provuar të kontaktojë edhe me drejtorin e Klinikës së Gjinekologjisë, Zef Ndrejaj, por i njëjti ka qenë i paqasshëm.
