Norvegjia tha se sulmet ndaj Agjencisë së OKB-së për Refugjatët Palestinezë në Lindjen e Afërt (UNRWA) janë të papranueshme ndërsa përsëriti mbështetjen e saj për Agjencinë, transmeton Anadolu.
Nga llogaria e platformës sociale X të Ministrisë së Jashtme, u publikua deklarata e ministres norvegjeze të Zhvillimit Ndërkombëtar, Anne Beathe Tvinnereim, lidhur me UNRWA-në.
Tvinnereim në deklaratën e saj tha se në “Konferencën e Reagimit Humanitar Emergjent për Gazën” të mbajtur dje nën organizimin e Jordanisë, u takua me Komisionerin e Përgjithshëm të UNRWA-së, Philippe Lazzarini dhe se i përsëriti atij mbështetjen e Norvegjisë për agjencinë.
Duke shprehur pikëllimin për vdekjen e personelit të UNRAWA-së në Gaza, Tvinnereim tha: “Sulmet kundër agjencisë janë të papranueshme. Punonjësit dhe komplekset e ndihmës humanitare duhet të mbrohen në kuadër të ligjit ndërkombëtar”.
Ministri i Jashtëm norvegjez, Espen Barth Eide më 24 prill u bëri thirrje donatorëve ndërkombëtarë që të mbështesin financiarisht UNRWA-në dhe të fillonin bashkëpunimin me agjencinë.
Ushtria izraelite e cila ka kryer sulme shumë herë ndaj objekteve të UNRWA-së, më 6 qershor bombardoi një shkollë të UNRWA-së në kampin e refugjatëve Nuseirat në pjesën qendore të Rripit të Gazës në të cilën ishin strehuar palestinezë të zhvendosur.
