Sipas një zyrtari nga Organizata Botërore e Shëndetësisë (OBSH), sistemet shëndetësore në mbarë botën kanë dhënë “shenjën e parë të rimëkëmbjes” pas tre viteve të pandemisë COVID-19, transmeton Anadolu.
Duke paraqitur rezultatet e sondazhit global të OBSH-së mbi vazhdimësinë e shërbimeve thelbësore shëndetësore gjatë pandemisë COVID-19, shefi i shërbimeve të integruara shëndetësore në OBSH, Rudi Eggers, tha se në fillim të vitit 2023 vendet kanë raportuar se kanë përjetuar ndërprerje të reduktuara në ofrimin e shërbimeve rutine shëndetësore.
“Është një lajm i mirëpritur që sistemet shëndetësore në shumicën e vendeve kanë filluar të rivendosin shërbimet thelbësore shëndetësore për miliona njerëz që i humbën ato gjatë pandemisë. Por ne duhet të sigurojmë që të gjitha vendet të vazhdojnë të mbyllin këtë hendek për të rikuperuar shërbimet shëndetësore dhe të zbatojnë mësimet e nxjerra për të ndërtuar sisteme shëndetësore më të përgatitura dhe më elastike për të ardhmen”, tha Eggers.
Sipas sondazhit, vendet që iu përgjigjën anketës raportuan ndërprerje të vazhdueshme në pothuajse një të katërtën e shërbimeve. Në 84 vende përqindja e shërbimeve të ndërprera ra mesatarisht nga 56 për qind në korrik-shtator 2020 në 23 për qind në nëntor 2022-janar 2023.
Eggert tha se një hap tjetër i rëndësishëm drejt rimëkëmbjes dhe tranzicionit të sistemit shëndetësor ishte se shumica e vendeve kanë bërë përparim në integrimin e shërbimeve COVID-19 në ofrimin rutinë të shërbimeve shëndetësore.
Shumica e 139 vendeve që iu përgjigjën anketës, tha ai, po ashtu kanë filluar të zbatojnë në praktikë atë që kishin mësuar gjatë pandemisë COVID-19, duke përfshirë përfshirjen e një numri strategjish inovative për zbutjen e ndërprerjes së shërbimit në ofrimin rutinë të kujdesit shëndetësor.
