Sekretari i Përgjithshëm i Kombet e Bashkuara, Antonio Guterres, dënoi “fuqishëm” një sulm vdekjeprurës me dron ndaj një spitali në Sudan, ku u vranë të paktën 60 persona, njoftoi të martën zëdhënësi i tij.
“Që nga prilli i vitit 2023, Organizata Botërore e Shëndetësisë ka verifikuar më shumë se 200 sulme që kanë dëmtuar objektet shëndetësore në Sudan, duke rezultuar në mbi 2.000 viktima,” tha në një deklaratë Stephane Dujarric.
Guterres ka kërkuar që të gjitha palët t’i respektojnë detyrimet e tyre sipas së drejtës ndërkombëtare humanitare, e cila mbron personelin dhe objektet mjekësore dhe ndalon sulmet ndaj civilëve dhe objekteve civile, shtoi Dujarric.
Deklarata erdhi pasi të paktën 60 persona, përfshirë fëmijë dhe punonjës shëndetësorë, u vranë në një sulm me dron ndaj spitalit mësimor El-Daein në shtetin e Darfurit Lindor më 20 mars.
“Sekretari i Përgjithshëm u bën thirrje palëve që t’i ulin menjëherë intensitetin e luftimeve dhe të bien dakord për ndërprerjen e armiqësive,” tha Dujarric.
Kreu i OKB-së gjithashtu përsëriti thirrjen që palët të angazhohen në përpjekjet ndërkombëtare të ndërmjetësimit, përfshirë ato të udhëhequra nga i dërguari i tij personal për Sudanin, me qëllim rikthimin në negociata për të siguruar një armëpushim të qëndrueshëm.
Organizata ndërkombëtare është e gatshme të mbështesë “hapa të mirëfilltë” për t’u dhënë fund luftimeve në Sudan dhe për ta hapur rrugën drejt një paqeje afatgjatë, tha Dujarric.
