Kombet e Bashkuara (OKB) deklaruan se përmbytjet e shkaktuara nga shirat e dendur në Afrikën Qendrore dhe Perëndimore kanë prekur më shumë se 700 mijë njerëz deri më tani, transmeton Anadolu.
Zëvendëszëdhënësi i Sekretarit të Përgjithshëm të OKB-së, Farhan Haq, tha në një konferencë për shtyp se shirat e dendur dhe përmbytjet kanë prekur Republikën e Afrikës Qendrore, Çadin, Bregun e Fildishtë, Republikën Demokratike të Kongos, Liberinë, Nigerin, Nigerinë, Malin dhe Togon.
Duke shprehur shqetësime për përmbytjet e shkaktuara nga shirat e dendur që kanë prekur qindra mijëra njerëz, Haq tha: “Fakti që shira të tillë të dendur ndodhën që në dy muajt e parë të sezonit të shirave është shqetësues. Më shumë se 700 mijë njerëz kanë qenë të ndikuar negativisht nga këto përmbytje të deritanishme”.
Haq theksoi se përballë përmasave të fatkeqësisë, OKB-ja ka bashkëpunuar me partnerët e saj dhe ka intensifikuar mbështetjen e saj për vendet e prekura nga shirat e dendur dhe përmbytjet, dhe vuri në dukje se janë përpjekur po ashtu të ofrojnë shërbime të shpërndarjes së ushqimit, strehimit, ujit dhe kanalizimeve.
Fondi Qendror i Kombeve të Bashkuara për Reagimin ndaj Emergjencave këtë vit ka dhënë një total prej 10 milionë dollarësh në ndihmë për qeveritë e Republikës Demokratike të Kongos dhe Nigerit, të cilat janë prekur nga përmbytjet.
