Një gjykatë pakistaneze vazhdoi paraburgimin për 14 ditë të tjera për ish-kryeministrin e vendit Imran Khan në rastin në të cilin ai akuzohet për zbulimin e sekreteve shtetërore, konfirmoi avokati i tij, raporton Anadolu.
Seanca dëgjimore për “çështjen kodi” u mbajt në një burg në qarkun verilindor Attock, rreth 80 kilometra nga kryeqyteti Islamabad, ku Khan aktualisht po mbahet për arsye sigurie.
Rasti lidhet me komunikimet diplomatike midis Washingtonit dhe Islamabadit, për të cilat Khan thotë se janë pjesë e një komploti të SHBA-së për të rrëzuar qeverinë e tij.
Gjykatësi Abul Hasnat, i cili mbërriti nga Islamabadi, vazhdoi paraburgimin e Khan-it deri më 10 tetor me kërkesë të Prokurorisë.
“Paraburgimi i Imran Khan-it është vazhduar deri më 10 tetor, që është një vendim krejtësisht i gabuar sepse Prokuroria nuk e dorëzoi raportin dhe gjyqtari ia zgjati paraburgimin në vend që ta lironte me nder”, u tha gazetarëve para burgut Attock Latif Khosa, avokati i Khan-it.
Ish-ministri i Jashtëm Shah Mahmood Qureshi u soll sot në një gjykatë në Islamabad në pranga ndërsa paraburgimi i tij gjyqësor gjithashtu u vazhdua deri më 10 tetor. Edhe Qureshi është arrestuar për “çështjen kodi”.
Të hënën, kryetari i Gjykatës së Lartë të Islamabadit, Aamir Farooq urdhëroi autoritetet të transferojnë Khan-in nga burgu Attock në burgun Adiala në Rawalpindi me kërkesë të avokatëve të tij.
Gjykata e Lartë pezulloi dënimin me të cilin Khan, 70-vjeç, u dënua nga një gjykatë në Islamabad më herët në gusht për fshehje të detajeve dhe shitje të paligjshme të dhuratave të qeverisë që mori gjatë mandatit të tij si kryeministër 2018-2022. Për rrjedhojë, komisioni zgjedhor e ndaloi të kryente funksione publike për 5 vjet.
Ish-lojtari i kriketit përballet me një sërë akuzash, i cili u shkarkua në një votim mosbesimi në prill 2022.
