Organizata për Çlirimin e Palestinës (PLO) u ka kërkuar vendeve që thanë se po pezullonin mbështetjen për UNRWA-n që të “tërheqin menjëherë vendimin e tyre”.
Siç është raportuar, disa vende perëndimore kanë njoftuar hapa të tillë pasi UNRWA tha se kishte hapur një hetim pasi Izraeli pretendoi se disa punonjës ishin të përfshirë në sulmet e 7 tetorit. Në mesin e këtyre vendeve janë SHBA-ja, Kanadaja, Australia, Britania, Finlanda, Italia etj. Vende tjera janë duke shqyrtuar akuzat.
Sekretari i Përgjithshëm i PLO Hussein al-Sheikh tha se vendimi i vendeve “përfshin rreziqe të mëdha politike dhe humanitare të ndihmës”.
“Në këtë kohë të veçantë dhe në dritën e agresionit të vazhdueshëm kundër popullit palestinez, ne kemi nevojë për mbështetjen maksimale për këtë organizatë ndërkombëtare dhe jo ndalimin e mbështetjes dhe ndihmës ndaj saj”, shkroi ai në X.
Grupi i rezistencës palestineze Hamas dënoi gjithashtu akuzat e Izraelit kundër Agjencisë së Kombeve të Bashkuara për Ndihmë dhe Punë për Refugjatët Palestinë në Lindjen e Afërt (UNRWA) me qëllim “ndërprerjen e financimit të saj dhe privimin e popullit tonë nga e drejta e tyre për shërbimet e këtyre agjencive ndërkombëtare”.
UNRWA u themelua në vazhdën e krijimit të shtetit të Izraelit në vitin 1948 për t’u siguruar qindra mijëra refugjatëve palestinezë që u zhvendosën me forcë arsim, kujdes shëndetësor, shërbime sociale dhe vende pune. Ajo filloi punën në vitin 1950.
