Papa Françesku ka bërë thirrje për paqe dhe ka kërkuar armëpushim “në të gjitha frontet”, gjatë lutjes së të dielës në Sheshin e Shën Pjetrit, raporton AP.
Papa kujtoi sulmin e vitit të kaluar të Hamasit në Izrael, duke kërkuar çlirimin e pengjeve që ende mbahen në Gaza dhe gjithashtu kërkoi t’i jepet fund dhunës në Liban.
Françesku i bëri thirrje komunitetit ndërkombëtar t’i japë fund hakmarrjes dhe të mos kryhen më sulme si ai i Iranit, që mund të çojnë në përshkallëzim të situatës.
“Të gjitha kombet kanë të drejtë të ekzistojnë në paqe dhe siguri dhe territoret e tyre nuk duhet të sulmohen apo pushtohen”, ka shtuar ai.
Papa Françesku shpalli një ditë agjërimi dhe lutjeje që do të kremtohet të hënën më 7 tetor, në përvjetorin e sulmit të Hamasit.