Ligjvënësit ukrainas miratuan sot një projektligj që shtrëngon rregullat e mobilizimit dhe dënimin për evazion nga shërbimi ushtarak, raporton Anadolu.
Rreth 283 deputetë votuan pro projektligjit, 21 kundër dhe 15 abstenuan.
Projektligji do të hyjë në fuqi pasi presidenti Volodymyr Zelenskyy ta nënshkruajë atë.
Legjislacioni i ri ul moshën e mobilizimit nga 27 në 25 vjeç dhe parashikon rregulla të reja për dhënien e njoftimeve për rekrutim.
Qytetari do të konsiderohet i informuar për domosdoshmërinë e paraqitjes në shërbimin ushtarak edhe nëse posta nuk dorëzon njoftimin përkatës. Dhjetë ditë pasi posta bën një shënim në lidhje me pamundësinë për të arritur te marrësi, një zyrë ushtarake mund t’i kërkojë policisë të arrestojë “shmangësin”.
Projektligji vendos kufizime të reja për përdorimin e transportit për njerëzit që fshihen nga shërbimi ushtarak dhe kufizon shërbimet konsullore për qytetarët ukrainas të moshës 18-60 vjeç që jetojnë jashtë vendit dhe nuk kanë dokumente për shërbimin ushtarak.
Ukrainasit me kategorinë e dytë dhe të tretë të aftësive të kufizuara, përveç ushtarakëve, duhet të kalojnë një kontroll të ri mjekësor për të përcaktuar përshtatshmërinë për shërbimin ushtarak.
U ngushtuan edhe mundësitë për të marrë vonesë nga ushtria, ndërkohë që autoritetet vendore u ngarkuan me dërgimin e rekrutëve në zyrat e regjistrimit.
Nga versioni përfundimtar i dokumentit u përjashtua edhe norma që parashikonte një çmobilizim të detyrueshëm pas 36 muajsh shërbimi, gjysma e të cilave ka ndodhur në vijën e parë.
Projektligji i diskutueshëm u prezantua për herë të parë në parlament në dhjetor 2023 dhe u dërgua për rishikim për shkak të pakënaqësisë publike. Versioni i përditësuar i publikuar më 6 shkurt, megjithatë, ka ruajtur pikat më të diskutueshme.
