Përfaqësuesit sudanezë kanë mbërritur në Jeddah të Arabisë Saudite për të rifilluar bisedimet me Forcat paraushtarake të Mbështetjes së Shpejtë (RSF), thanë burimet e qeverisë sudaneze për Reuters të shtunën, pas tre muajsh luftime midis ushtrisë dhe RSF.
Bisedimet e mëparshme në Jeddah të ndihmuara nga Arabia Saudite dhe Shtetet e Bashkuara u pezulluan nga të dy vendet në fillim të qershorit pas shkeljeve të shumta të armëpushimit. Arabia Saudite dhe SHBA nuk kanë konfirmuar ende rifillimin e bisedimeve midis fraksioneve ndërluftuese të Sudanit.
Në një nismë tjetër, një përpjekje ndërmjetësimi e nisur nga Egjipti filloi të enjten, përpjekje e mirëpritur si nga ushtria sudaneze, e cila ka lidhje të ngushta me Egjiptin, ashtu edhe nga RSF.
Një seri armëpushimesh kanë dështuar për të ndalur luftimet që shpërthyen më 15 prill ndërsa ushtria dhe RSF-ja luftonin për pushtet. Konflikti ka shkaktuar më shumë se 3 milionë të zhvendosur, duke përfshirë më shumë se 700,000 të cilët kanë ikur në vendet fqinje.
Të shtunën, të paktën katër civilë u vranë dhe katër u plagosën në një sulm me dron që synonte një spital në qytetin Omdurman, tha ministria e shëndetësisë e Sudanit, duke akuzuar RSF-në për kryerjen e sulmit. /mesazhi
