Një epidemi e hepatitit A ka shpërthyer në Rripin e Gazës për shkak të mbipopullimit në zonat e zhvendosjes, tha sot Ministria e Shëndetësisë, transmeton Anadolu.
Ministria paralajmëroi për pezullimin e analizave të gjakut në çdo moment për shkak të mungesës së materialeve të nevojshme, pa dhënë detaje të mëtejshme.
Kushtet me të cilat përballen të zhvendosurit po përkeqësohen nga mungesa e tualeteve dhe objekteve sanitare, së bashku me akumulimin e mbeturinave pranë tendave të ndërtuara së fundmi.
Situatat e tmerrshme shtohen edhe nga mungesa e ujit brenda kampeve të refugjatëve, ndërsa shumë prej të zhvendosurve luftojnë për t’u mbrojtur nga pasojat e ndotjes dhe mungesës së higjienës.
Hepatiti A është një virus që transmetohet përmes gëlltitjes së ushqimit dhe ujit të kontaminuar ose kontaktit të drejtpërdrejtë me një person të infektuar.
Izraeli ka sulmuar Rripin e Gazës që nga një sulm ndërkufitar nga grupi palestinez Hamas më 7 tetor, duke vrarë të paktën 24.448 palestinezë, kryesisht gra dhe fëmijë, dhe duke plagosur 61.504 të tjerë, sipas autoriteteve lokale shëndetësore.
Rreth 1.200 izraelitë besohet se janë vrarë në sulmin e Hamasit.
Sipas OKB-së, 85 për qind e popullsisë në Gaza është tashmë e zhvendosur brenda vendit, ndërsa përballet me mungesë akute të ushqimit, ujit të pastër dhe ilaçeve, kurse 60 për qind e infrastrukturës së enklavës është dëmtuar ose shkatërruar.
