Përleshje të ashpra kanë shpërthyer në qytetin Baidoa të Somalisë mes forcave qeveritare dhe luftëtarëve besnikë ndaj ish-presidentit të rajonit South West State.
Sipas autoriteteve, ushtria përdori avionë luftarakë dhe dronë pasi mijëra luftëtarë lokalë hynë në qytet. Ushtria pretendon se i ka zmbrapsur ata pas luftimeve të ashpra.
Organizata Mjekët pa Kufij tha se të paktën tre persona kanë vdekur, përfshirë një punonjës shëndetësor. Spitali rajonal ka pranuar 69 të plagosur, mes tyre pesë fëmijë.
Rrugët drejt spitaleve janë bllokuar, duke vështirësuar trajtimin e të plagosurve. Mjekët pa Kufij tha se një ambulancë është plaçkitur dhe një punonjës i saj është plagosur.
Përleshjet në Baidoa janë përshkallëzuar disa herë gjatë gjashtë javëve të fundit, duke shkaktuar pasoja të rënda për civilët. /mesazhi
