Policia e Kosovës ka kapur në Zveçan të martën material që dyshohet se përdorej nga dy organizatat terroriste “Mbrojtja Civile” dhe “Brigada e Veriut” kundër Policisë së Kosovës. Sipas Policisë, thasët me rërë janë gjetur në një objekt publik në këtë komunë.
“Policia e Kosovës ka pranuar informacione se në një objekt publik në Komunën e Zveçanit, ka disa gjëra materiale të cilat janë shfrytëzuar nga grupet terroriste serbe në kohën e barrikadave. Sot, gjatë kontrolleve që ka bërë policia ka konstatuar se në katin e tretë të kësaj ndërtese janë dhjetëra thasë të mbushur me rërë që kanë qenë si istikame për ta sulmuar Policinë dhe në mbrojtje të barrikadës dhe kontrollimit të rrugës kryesore që të dërgon në Zveçan. Ky objekt publik është shfrytëzuar nga pjesëtarët e organizatave terroriste si ‘Mbrojtja Civile’ dhe ‘Brigada e Veriut’”, ka thënë zëvendësdrejtori i Policisë për rajonin e veriut, Veton Elshani.
Elshani ka thënë se kjo është dëshmi se “grupet kriminale kanë qenë të armatosur rëndë dhe kanë pasur plane që të sulmojnë Policinë e Kosovës në rast se ata do të tentonin t’i largonin barrikadat”.
Më 29 qershor Qeveria e Kosovës i pati shpallur organizata terroriste. Të dyja besohet se veprojnë në veri të Kosovës dhe se kanë qindra pjesëtarë.
