Polonia pret një “falje të drejtpërdrejtë” nga ambasadori izraelit në Varshavë për vrasjen e një punonjësi polak të ndihmës në sulmet ajrore izraelite të hënën në Gaza, transmeton Anadolu.
“Ne të gjithë e dimë se çfarë ndodhi, sa e pakuptimtë dhe e panevojshme ishte ajo vdekje”, tha kryeministri polak, Donald Tusk, në një fushatë të mbajtur këtë fundjavë për zgjedhjet e qeverisë vendore.
Siç raporton agjencia shtetërore e lajmeve PAP, kryeministri polak tha se pret një shpjegim të plotë dhe të menjëhershëm të tragjedisë dhe dëmshpërblim për të afërmit e viktimës.
“Nëse ambasadori vendos të flasë publikisht në mediat tona, ai duhet të shfrytëzojë rastin për të ofruar një falje normale njerëzore. Unë gjithashtu do të doja shumë dhe kjo është në interesin e Izraelit, përfaqësuesit të atij vendi, veçanërisht në një situatë të tillë, që të respektojë emocionet e polakëve dhe të komunikojnë për këtë çështje në mënyrë të qartë dhe të drejtpërdrejtë”, tha Tusk.
Dje, në një intervistë online ambasadori izraelit, Yacov Livne, tha se vdekjet e punonjësve të ndihmës ishin rezultat i një “aksidenti” tragjik që kishte ndodhur gjatë kohës së luftës, pavarësisht raporteve të shumta të mediave dhe analizave që thonë se sulmet ishin qartësisht të qëllimshme.
Ai gjithashtu dha garanci se autoritetet izraelite do të shqyrtojnë shkaqet e incidentit dhe do të informojnë qeveritë e Polonisë dhe vendeve të tjera të prekura për gjetjet e tyre.
Të hënën, Damian Sobol, një vullnetar që punonte në Gaza për grupin e ndihmës humanitare ‘World Central Kitchen’ (WCK), u vra së bashku me gjashtë të tjerë kur një kolonë me të cilën ai po udhëtonte u godit në një sulm ajror izraelit.
