Presidenti izraelit Isaac Herzog dënoi “brutalitetin” e dhunës së kolonëve në Bregun Perëndimor, ndërsa kritikoi ashpër edhe Ministrin e Sigurisë Kombëtare Itamar Ben Gvir për trajtimin e të burgosurve në burgjet izraelite, gjatë ceremonisë së ndarjes së çmimeve për Çmimin e Unitetit në Jerusalem. “Po dëshmojmë një valë dhune të tmerrshme të kryer nga një turmë anarkike, akte që përdhosin dhe shkelin çdo normë themelore morale, ligjore dhe hebraike”, deklaroi ai.
“Nuk duhet ta tolerojmë këtë brutalitet që vjen nga margjinat e shoqërisë dhe na kërcënon të gjithëve”, vazhdoi Herzog. “Populli ynë është një popull i mrekullueshëm, me forcë të jashtëzakonshme, por duhet të vendosim vija të kuqe. E them me zë të lartë: uniteti fillon me njerëzimin”. Për Herzogun, “abuzimi me të burgosurit” duhet të jetë “i ndaluar”, pavarësisht nga ashpërsia e krimeve të tyre, një referencë me sa duket e drejtpërdrejtë ndaj videos së Ministrit të Sigurisë Kombëtare Itamar Ben Gvir duke tallur aktivistët e burgosur të Flotiljes Globale.
Ben Gvir u përgjigj në X: “Një president që i quan qindra mijëra qytetarë izraelitë brutalë është i papërshtatshëm për të shërbyer si president. Pikë.” Keqtrajtimi i shfaqur në video nga ministri ultranacionalist kishte tërhequr kritika edhe nga kryeministri Benjamin Netanyahu (“Nuk është në përputhje me vlerat dhe normat izraelite”), por pavarësisht kësaj, Ben Gvir mbetet në postin e tij qeveritar.
