Presidentja e Sllovenisë, Natasha Pirc Musar, mbërriti për një vizitë dyditore në Bosnje e Hercegovinë (BeH), raporton Anadolu.
Pirc Musar u prit me nderime ushtarake nga kreu i Presidencës së BeH-së, Zhelko Komshiq dhe anëtarët e Presidencës së BeH-së, Denis Beqiroviq dhe Zheljka Cvijanoviq.
Më pas u zhvillua takimi i anëtarëve të Presidencës së BeH-së dhe presidentes sllovene, si dhe takimi i delegacioneve të dy vendeve.
Pritet që fokusi i bisedimeve të jetë përafrimi i BeH-së me Bashkimin Evropian, përkatësisht plotësimi i kushteve për fillimin e negociatave për anëtarësim në mars.
Siç është paralajmëruar, Pirc Musar do të vizitojë edhe pjesëtarët e kontingjentit të 48-të të Ushtrisë Sllovene, të cilët veprojnë në kuadër të misionit ushtarak EUFOR Althea dhe selisë së NATO-s në Sarajevë. Gjithashtu është planifikuar një takim me kryetaren e Këshillit të Ministrave të Bosnjë-Hercegovinës, Borjana Krishto dhe përfaqësues të të dy dhomave të Asamblesë Parlamentare të BeH-së.
Gjatë vizitës së saj në Bosnje dhe Hercegovinë, presidentja e Sllovenisë do të marrë pjesë edhe në akademinë ceremoniale me rastin e 40 vjetorit të Lojërave Olimpike Dimërore në Sarajevë.
Pirc Musar nesër do të marrë pjesë në manifestimin “DiplomatSKI” të organizuar nga Ambasada e Sllovenisë në Bosnje dhe Hercegovinë, kur zyrtarisht do të hapet pista e re e skijimit për nder të skiatorit legjendar dhe fituesit të medaljes së argjendtë olimpike, sllovenit Jure Franko.
