Princi jordanez i Kurorës Al Husein bin Abdullah II të enjten u martua me arkitekten saudite Rajwa Al Saif, ndërsa në ceremoninë e martesës morën pjesë shumë anëtarë të familjeve mbretërore nga e gjithë bota, raporton Anadolu.
Dasma luksoze u mbajt në Pallatin Zahran në kryeqytetin jordanez Aman, kurse si dëshmitarë ishin mbreti Abdullah II, Princi Hassan bin Talal dhe babai i nuses.
Pas ceremonisë së martesës, televizioni shtetëror jordanez njoftoi se princi i kurorës dhe nusja e tij udhëtuan nëpër kryeqytet të shoqëruar nga kolona e gardës mbretërore drejt Pallatit Al Husseiniya, ku ishte organizuar pritja dhe një banket.
Menjëherë pas ceremonisë së martesës u dha një dekret mbretëror me të cilin nusja Al Saif mori titullin e princeshës. Mbreti dhe Mbretëresha organizuan një dasmë në Pallatin Al Husseiniya ku morën pjesë më shumë se 1.700 të ftuar, përfshirë krerët e shteteve.
Mbreti Abdullah ka katër fëmijë, Princin e Kurorës Husein (29), Princeshën Iman (27), Princeshën Salma (23) dhe Princin Hashim (18). Princi Husein është trashëgimtari legjitim i fronit jordanez, sipas Kushtetutës jordaneze.
Në ceremoninë e dasmës së Princit të Kurorës Husein morën pjesë, ndër të tjera, Mbreti i Malajzisë Al-Sulltan Abdullah Ri’ayatuddin Al-Mustafa Billah Shah, mbreti holandez Willem-Alexander, presidenti i Irakut Abdul Latif Rashid, kryeministri libanez Najib Mikati, Princi i Kurorës së Kuvajtit Mishal Al-Ahmad Al-Jaber Al-Sabah dhe gruaja e presidentit amerikan Joe Biden, Jill Biden dhe vajza e saj Ashley Biden.
