Organizata humanitare mjekësore Mjekët pa Kufij (MSF) paralajmëroi të hënën se një sulm tokësor izraelit në qytetin Rafah në Rripin jugor të Gazës do të ishte katastrofik.
“Një ofensivë tokësore izraelite në Rafah do të ishte katastrofike dhe nuk duhet të vazhdojë. Ndërsa bombardimet ajrore të zonës vazhdojnë, më shumë se një milion njerëz, shumë prej të cilëve jetojnë në tenda dhe strehimore të improvizuara, tani përballen me një përshkallëzim dramatik të kësaj masakre,” tha Drejtoresha e Përgjithshme e MSF-së, Meinie Nicolai.
Ajo theksoi se as një vend në Rripin e Gazës nuk është i sigurt dhe zhvendosja e detyruar i ka bërë njerëzit të shkojnë në Rafah, ku janë bllokuar në një zonë të vogël dhe nuk kanë zgjidhje.
“E gjithë kjo ndodhi para syve të liderëve botërorë. Tani është bërë pothuajse e pamundur të punosh në Gaza, të gjitha përpjekjet tona për të ofruar ndihmë shpëtimi për palestinezët janë zvogëluar nga armiqësitë izraelite”, shtoi Nicolai.
Ajo i bëri thirrje qeverisë së Izraelit të akuzuar për gjenocid “të ndalojë menjëherë këtë ofensivë dhe të gjitha qeveritë që i mbështesin ato, përfshirë Shtetet e Bashkuara të Amerikës, të marrin masa konkrete për të arritur një armëpushim të plotë dhe të përhershëm”.
Më shumë se gjysma e 2,3 milionë banorëve të Gazës kanë gjetur një lloj strehimi në Rafah, pasi Izraeli bombardon pjesën tjetër të enklavës së bllokuar në përgjigje të sulmit ndërkufitar të Hamasit më 7 tetor. Por, ata mund të detyrohen të ikin pasi Izraeli planifikon një sulm tokësor në Rafah, pavarësisht kundërshtimit ndërkombëtar.
Më 26 janar, pas një padie për gjenocid të ngritur nga Republika e Afrikës së Jugut, Gjykata Ndërkombëtare e Drejtësisë vendosi që Izraeli duhet të përmbahet nga çdo veprim në lidhje me vrasjen, sulmet dhe shkatërrimin e banorëve të Rripit të Gazës dhe të marrë të gjitha masat për të parandaluar gjenocid.
Megjithatë, forcat izraelite që nga 7 tetori, vazhdojnë të kryejnë sulme që kanë vrarë të paktën 28.340 palestinezë, si dhe kanë lënë të plagosur 67.984, kryesisht gra dhe fëmijë.
