Gjykata e Apelit e ka konfirmuar vendimin e shkallës së parë, me çka rikonfirmohen denimet e të akuzuarëve në rastin “Monstra”. Gjykata e shkallës së dytë e ka shpallur vendimin e saj lidhur me këtë rast dhe ankesat e palës mbrojtëse janë hedhur poshtë.
Të akuzuarit, Alil Demiri dhe Afrim Ismailloviq, të cilët janë në arrati bashkë me Agim Ismailloviqin, u dënuan me burg të përjetshëm për veprën “terrorizëm”, Fejzi Aziri u dënua me 15 vjet burg për “ndihmë”, ndërkaq Haki Aziri u dënua me 9 vjet burg, gjithashtu për ndihmë. I akuzuari Sami Luta u shpall i pafajshëm, pasi që Prokuroria e tërhoqi akuzën në mungesë të provave. Vendimi i shkallës së parë për vrasjen e pesëfishtë në Liqenin e Smillkovës, u shqiptua më 23 shkurt të vitit 2021.
Më 1 dhjetor të vitit 2017-të, Gjykata Supreme e Republikës pranoi ankesat e palës mbrojtëse dhe aktvendimet e shkallës së parë dhe të dytë u shfuqizuan, ndërkaq lënda u rikthye gjykim të shkallës së parë. Me këtë rast të gjithë të akuzuarit dolën nga burgu. Më 21 mars të vitit 2018-të, Prokuroria Speciale e mori nën kompetencë rastin, ndërkaq prokurorë të lëndës u caktuan Fatime Fetai dhe Gavrill Bubevski. Pas shpërbërjes së PSP-së, më 17 shtator të vitit 2019-të, lënda u rikthye në Prokurorinë e rregullt pasi Prokuroria u shua, por prokurorët mbetën të njëjtë. Vrasja në Smillkovë ndodhi më 12 prill 2012.
