Numri i të vdekurve në sulmet dyditore të forcave izraelite në qytetin Jenin në Bregun Perëndimor të pushtuar është rritur në 12, raporton Anadolu.
Ministria palestineze e Shëndetësisë njoftoi se forcat izraelite vranë një tjetër palestinez në Jenin.
Kështu, numri i palestinezëve që humbën jetën nga sulmet ajrore dhe tokësore të forcave izraelite në qytetin Jenin dhe kampin e refugjatëve në Jenin u rrit në 12, ndërsa 120 persona u plagosën, 20 prej tyre në gjendje të rëndë.
Sulm ajror gjatë tërheqjes nga kampi
Ushtria izraelite qëlloi nga ajri një “grup të armatosur” që tërhiqej nga kampi i refugjatëve Jenin, të cilin e kishte rrethuar për rreth 48 orë.
Në deklaratën e ushtrisë izraelite në lidhje me sulmin thuhet se “forcat e sigurisë shënjestruan një grup individësh të armatosur që përbënin kërcënim për ta ndërsa po largoheshin nga kampi Jenin”.
Ende nuk ka informacione nga burime shëndetësore nëse ka pasur të vdekur apo të lënduar në këtë sulm.
Ushtria izraelite po tërhiqet
Në mbrëmje, një kolonë e përbërë nga automjete të shumta të blinduara të ushtrisë izraelite u pa të largohej nga kampi i refugjatëve Jenin, i cili ishte nën rrethim për 48 orë dhe u nis drejt qytetit Jenin.
Zyrtarët e ushtrisë izraelite në një deklaratë për Anadolu konfirmuan se trupat e tyre kanë filluar të tërhiqen.
Ushtria izraelite sulmoi qytetin Jenin dhe kampin e refugjatëve në Jenin të hënën, më 3 korrik, si dhe rrethoi rajonin.
