Rreth 70 mijë persona mbushën sheshin në Pragë duke protestuar kundër qeverisë çeke dhe i bënë thirrje koalicionit qeverisës që të bëjë më shumë për të kontrolluar çmimin në rritje të energjisë elektrike.
Protestuesit shprehën pakënaqësinë edhe kundër Bashkimit Europian e NATO-s. Ata thanë vendi i tyre duhet të jetë neutral ushtarakisht dhe të sigurojë kontrata direkte me furnizuesit e gazit, përfshirë edhe Rusinë.
Protestuesit ishin një numër grupimesh politike të ekstremit të djathtë dhe të skajshëm, përfshirë edhe partinë komuniste.
“Qëllimi i demonstratës tonë është të kërkojmë ndryshim në zgjidhjen e çështjes së çmimit të energjisë dhe të gazit, të cilat do të shkatërrojnë ekonominë tonë”, tha Jiri Havel, njëri prej bashkëorganizatorëve të protestës.
Protesta u mbajt në sheshin qendror të Pragës, një ditë pasi qeveria i mbijetoi një mocioni mosbesimi
Kryeministri Petr Fiala, që drejton koalicionin qeverisës 5-partiak të qendrës së djathtë, tha se protesta ishte organizuar nga forca pro-ruse.
“Protesta u thirr nga forca që janë pro Rusisë, janë pothuajse forca ekstreme dhe që janë kundër interesave të Republikës Çeke”, u shpreh Kryeministri. /tvklan
