Rusia pretendoi sot se ka marrë kontrollin e dy vendbanimeve në Ukrainën lindore dhe verilindore, transmeton Anadolu.
Një deklaratë nga Ministria ruse e Mbrojtjes pretendon se forcat e saj në rajonin lindor të Donetskut pushtuan fshatin Dibrova, i cili ndodhet rreth 19 kilometra në verilindje të qytetit të Slovianskut.
Sloviansk është një nga fortesat e fundit të Ukrainës në rajon, përveç Kramatorskut, i cili u bë qendra e saj administrative pasi Moska pushtoi qytetin e Donetskut në vitin 2014.
Thuhet se forcat ruse morën gjithashtu kontrollin e fshatit Myropilske, i vendosur më pak se një kilometër nga kufiri i Ukrainës me Rusinë në rajonin verilindor të Sumit.
Shtabi i Përgjithshëm i Ukrainës pretendoi në një deklaratë të mëparshme se forcat ruse bënë gjashtë përpjekje për të kaluar nëpër mbrojtjen e Ukrainës pranë katër vendbanimeve në frontin Lyman, përfshirë Dibrovën.
Megjithatë, Ukraina ende nuk ka komentuar mbi pretendimet e fundit të Rusisë ndërsa verifikimi i pavarur i pretendimeve është i vështirë për shkak të luftës në vazhdim.
