Rusia dhe Ukraina konfirmuan sot se është zhvilluar një shkëmbim i të burgosurve ku përfshiheshin 82 ushtarakë dhe dy civilë, transmeton Anadolu.
Ministria ruse e Mbrojtjes tha se 40 ushtarakë, të cilët ishin në rrezik vdekjeprurës, u kthyen nga Ukraina si rezultat i negociatave.
“Personeli i liruar do të fluturojë për në Moskë me avion transportues rus për t’iu nënshtruar trajtimit dhe rehabilitimit në objektet mjekësore të Ministrisë së Mbrojtjes së Rusisë”, thuhet në njoftim.
Ministria gjithashtu tha se të gjithë ushtarakëve të liruar po u sigurohet “kujdesi i nevojshëm mjekësor dhe psikologjik”.
Paralelisht, kreu i zyrës presidenciale të Ukrainës, Andriy Yermak, njoftoi se 44 ukrainas u sollën në shtëpi nga Rusia.
“Midis tyre – 36 ushtarë të thjeshtë dhe rreshterë dhe 6 oficerë. Këta janë ushtarë, roje kufitare, roje kombëtare, marinarë”, tha Yermak në Telegram.
“Ne gjithashtu liruam dy civilë”, tha ai më tej.
Yermak tha se ekipi në selinë koordinuese për trajtimin e të burgosurve të luftës vazhdon të përmbushë detyrën e presidentit Volodymyr Zelenskyy për “kthimin e të gjithëve në shtëpi”.
“Fuqia e një shteti matet nga mënyra se si ai i vlerëson njerëzit e tij. Parimi ynë është që ukrainasit janë vlera më e lartë. Le t’i kthejmë të gjithë”, shtoi ai.
Më shumë se 2.000 të burgosur janë shkëmbyer midis Rusisë dhe Ukrainës që nga fillimi i luftës në shkurt 2022, sipas shifrave të përpiluara nga Anadolu.
