Votimi mbi një rezolutë të Këshillit të Sigurimit të OKB-së që bën thirrje për pezullimin e luftimeve në Gaza për të ofruar ndihma u shty sot për të tretën ditë radhazi, raporton Anadolu.
Të enjten, 15 anëtarë të Këshillit pritet të votojnë për rezolutën, e cila fillimisht u shty të hënën.
Teksti, i hartuar nga Emiratet e Bashkuara Arabe (EBA), bën thirrje për pezullimin urgjent të armiqësive për të lejuar qasje të sigurt dhe të papenguar humanitare dhe për hapa urgjentë drejt një ndërprerjeje të qëndrueshme të përleshjeve.
Duke riafirmuar se të gjitha palët në konflikt duhet t’u përmbahen detyrimeve të tyre sipas ligjit ndërkombëtar, rezoluta kërkon gjithashtu që me shpejtësi të vendoset një mekanizëm monitorues i OKB-së.
Izraeli ka sulmuar ashpër Rripin e Gazës që nga sulmi i 7 tetorit nga Hamasi, duke vrarë të paktën 19.667 palestinezë, kryesisht gra dhe fëmijë, dhe duke plagosur 52.586 të tjerë, sipas autoriteteve shëndetësore në enklavë.
Masakra izraelite ka dëmtuar ose shkatërruar gjysmën e shtëpive në Gaza, ndërsa gati 2 milionë njerëz janë detyruar të zhvendosen brenda enklavës me popullsi të dendur, duke u përballur po ashtu me mungesë ushqimi dhe uji të pastër.
Gati 1.200 izraelitë thuhet se janë vrarë në sulmin e Hamasit, ndërsa më shumë se 130 pengje mbeten në robëri.
