Sindikata më e madhe bujqësore e Spanjës COAG ka lëshuar një raport duke paralajmëruar për efektin gjymtues të thatësirës së vazhdueshme masive në sektorin bujqësor të vendit, transmeton Anadolu.
COAG tha se thatësira po “mbyt” 80 për qind të tokës bujqësore spanjolle dhe tashmë ka çuar në “humbje të pakthyeshme” të mbi 5 milionë hektarëve të drithërave.
Sindikata tha se të gjitha të korrat e grurit dhe thekrës në tetë rajone spanjolle janë humbur praktikisht për shkak të mungesës së reshjeve.
Ajo gjithashtu paralajmëroi se pemët frutore në Andaluzi, Katalonjë, Murcia dhe Valencia janë në pragun ekstrem, pasi kufizimet e ujit “kërcënojnë seriozisht qëndrueshmërinë e pemëve, kështu që shumë fermerë do të duhet t’i shkulin ato”.
Raporti identifikon Andaluzinë në jug si rajonin më të goditur, me sistemin kryesor hidraulik vetëm 25,7 për qind të plotë, një rënie prej 10,8 për qind krahasuar me të njëjtën kohë të vitit të kaluar kur thatësira kishte filluar tashmë.
Kjo do të thotë se kultivimi i orizit në rajon, me prodhime me rreth 320 mijë tonë në vit, praktikisht do të zhduket. Prodhimi i pambukut të zonës, së bashku me kulturat e tij perimore, pritet gjithashtu të ndikohet rëndë.
Pemët ikonike të ullirit të Andaluzisë gjithashtu janë në një “gjendje jashtëzakonisht kritike”, me parashikimet që sugjerojnë se të korrat në disa zona mund të arrijnë vetëm 20 për qind të prodhimit të zakonshëm. Pemët e bajameve me ujitje intensive janë në gjendje edhe më të keqe.
Në të gjithë vendin, blegtorët e mëdhenj e kanë gjithnjë e më të vështirë të mbështesin aktivitetin e tyre pasi kullotat po thahen. Rrjedhimisht, sindikata parashikon sërish rritje të madhe të çmimit të ushqimit të kafshëve.
Edhe bletarët po përballen me një situatë të rëndë për shkak të mungesës së bimëve të lulëzuara, të cilat pengojnë ndjeshëm prodhimin e mjaltit të bletëve. Ky është viti i tretë radhazi që sektori pritet të jetë jofitimprurës, duke çuar që shumë profesionistë të braktisin sipërmarrjet e tyre.
Sot, ministrat e Spanjës u mblodhën në një takim urgjent për të diskutuar kushtet e rënda të thatësirës së vendit.
Spanja është prodhuesi i katërt më i madh bujqësor në Bashkimin Evropian (BE), ndërsa sipas të dhënave të vitit 2019 nga Ministria e Bujqësisë së Spanjës, duke kultivuar rreth 23,2 milionë hektarë tokë bujqësore.
