Një profesor nga Universiteti i Stokholmit e ndaloi një studente turke të marrë pjesë në një program stazhi me arsyetimin se “Turqia po pengon anëtarësimin e Suedisë në NATO”, transmeton Anadolu Agency (AA).
TRT World, kanali i lajmeve në gjuhën angleze i transmetuesit publik TRT, siguroi qasje në emailin e dërguar nga Per Carlbring, i cili drejton një grup kërkimor të psikologjisë klinike në universitet.
Fatma Zehra S., studente e vitit të tretë në psikologji në Universitetin Ibn Haldun të Istanbulit, u pranua përmes një fondi Erasmus+ për stazhin e verës 2023 në një universitet që ajo do të zgjidhte.
Një nga stazhet për të cilat ajo aplikoi ishte në Universitetin e Stokholmit në Suedi. Më 23 nëntor, Fatma i dërgoi një email Carlbring-ut, ku kërkonte pjesëmarrjen në një projekt kërkimor të drejtuar prej tij.
Disa orë më vonë, Carlbring u përgjigj: “Do të doja t’ju pranoja. Megjithatë, duke qenë se Turqia nuk e lejon Suedinë të anëtarësohet në NATO, unë duhet të refuzoj. Më falni!”
Duke folur për TRT World, Fatma tha: “Pasi mora këtë përgjigje, thjesht u trondita. M’u desh shumë kohë për ta përpunuar”.
“Ne marrim shumë kërkesa nga studentët që janë të interesuar të na vizitojnë si praktikantë kërkimorë. Nuk jemi në gjendje t’i pranojmë të gjitha, por presim që çdo kërkesë të ketë përgjigjen në mënyrë profesionale”, tha për TRT World Fredrik Jonsson, kreu i departamentit të psikologjisë në Universitetin e Stokholmit.
“Në këtë rast, sapo kemi mësuar për këtë çështje, kemi vepruar dhe e kemi trajtuar sipas rutinës sonë”, shtoi ai.
Ndërkohë, TRT World tha se Carlbring nuk iu përgjigj kërkesës për koment.
Mund të jetë “maja e ajsbergut”
Fatma ka bërë një ankesë zyrtare, duke besuar se ky incident mund të ketë qenë thjesht “maja e ajsbergut”.
“Nëse ma ka bërë mua, do ta bënte këtë edhe me studentë të tjerë me prejardhje të ndryshme racore që aplikojnë në universitet”, tha ajo.
Studentja turke ka paraqitur ankesë për diskriminim në universitet më 5 dhjetor, duke e përshkruar përgjigjen e profesorit si “të bazuar në bindje politike” dhe “diskriminuese, mbase edhe plotësisht raciste”.
“Përzierja e një qytetari të thjeshtë dhe një studenteje – që dëshiron t’i ndjekë studimet në kushtet më të mira të mundshme – me qëndrimin politik të qeverisë së vendit prej nga është, është një mënyrë famëkeqe e të menduarit dhe gjykimit të aftësive dhe karakterit të një individi”, shkruan Fatma në ankesë.
Më 6 dhjetor, ajo mori një përgjigje nga Torun Lindholm Ojmyr, nënkryetare e departamentit të psikologjisë, duke kërkuar falje për atë që ndodhi.
Ojmyr ka thënë se Carlbring pranoi se sjellja e tij ishte e papërshtatshme dhe e gabuar, duke shtuar se “disa masa aktive janë planifikuar në departament në vijimësi”, duke përfshirë “trajnimin në kushte të barabarta dhe Aktin Suedez të Diskriminimit”.
Fatma mendon se kjo nuk mjafton.
“Ajo që doja që ata të bënin është të merrnin masa aktive për sjelljen e tij”, tha ajo.
“Sjellje fëminore dhe raciste”
Fatma tha se ende nuk ka marrë një falje formale nga vetë profesori.
“Në këtë pikë, unë shpresoj se ai do të më dërgonte falje, por ai nuk e ka bërë, dhe jam e zhgënjyer për këtë”, shprehet ajo.
“Unë mendoj se kjo sjellje është fëminore, raciste dhe vërtet e papërshtatshme. Unë jam e fortë mendërisht, por studentët e tjerë që kanë pasiguri për aplikimin në programe të ndryshme nuk do të mund ta marrin veten nga një përgjigje e tillë”, tha ajo.
Pavarësisht incidentit, aplikimi i saj u pranua nga një profesor tjetër psikologjie në të njëjtin universitet, tha Fatma, pasi planifikon të vazhdojë stazhin këtë verë.
Suedia dhe Finlanda aplikuan zyrtarisht për t’u bashkuar me NATO-n në maj, vendim i nxitur nga lufta e Rusisë kundër Ukrainës.
Por Turqia – anëtare e NATO-s për më shumë se 70 vjet – shprehu kundërshtime, duke akuzuar të dy vendet se tolerojnë dhe madje mbështesin grupet terroriste, duke përfshirë PKK-në dhe organizatën terroriste FETO.
Qershorin e kaluar, Turqia dhe dy vendet nordike nënshkruan një memorandum në një samit të NATO-s në Madrid për të adresuar shqetësimet legjitime të sigurisë së Ankarasë, duke hapur rrugën për anëtarësimin e tyre përfundimtar në aleancë.
