Presidenti i SHBA-së, Donald Trump, tha se Shtetet e Bashkuara nuk do t’i harrojnë kurrë sulmet e 11 shtatorit 2001 dhe e lidhi luftën e atëhershme kundër terrorizmit me luftën aktuale ndaj Iranit.
Duke folur të premten në Pentagon, në ceremoninë përkujtimore të 25-vjetorit të sulmeve, Trump tha se SHBA-ja vazhdon të luftojë për fitore.
“Ne nuk kemi zgjedhje. Mund të ketë vetëm fitore. Ne luftojmë fort. Ne luftojmë për të fituar”, tha Trump.
Në sulmet e 11 shtatorit 2001, një nga avionët e rrëmbyer u përplas me Pentagonin në Uashington, ku humbën jetën 184 persona. Në total, në sulmet ndaj Qendrës Botërore të Tregtisë, Pentagonit dhe në Pensilvani u vranë 2,977 persona.
Trump nderoi pjesëtarët e ushtrisë amerikane që kanë shërbyer në të ashtuquajturën “luftë kundër terrorizmit” dhe e cilësoi Iranin si “sponsorizuesin numër një të terrorizmit në botë”.
Ai tha se ushtarët amerikanë po punojnë aktualisht për të siguruar që Irani të mos ketë kurrë armë bërthamore.
Në ceremoninë në Pentagon, edhe sekretari amerikan i Mbrojtjes, Pete Hegseth, kritikoi ashpër Iranin. Trump gjithashtu sulmoi “fanatikët” brenda SHBA-së, në një deklaratë që dukej se i referohej kundërshtarëve të tij politikë. /mesazhi
