Presidenti i SHBA-së, Donald Trump, ka deklaruar se SHBA-ja do të punojë për t’i dhënë fund konfliktit në Sudan me kërkesë të Princit të Kurorës Saudite, Mohammed bin Salman, transmeton Anadolu.
“Madhëria e tij do të donte që unë të bëja diçka shumë të fuqishme që ka të bëjë me Sudanin. Nuk ishte në planet e mia të përfshihesha në këtë. Mendova se ishte thjesht diçka e çmendur dhe jashtë kontrollit, por thjesht e shoh sa e rëndësishme është kjo për ju dhe për shumë nga miqtë tuaj në dhomë”, tha Trump në Forumin e Investimeve saudite-amerikane një ditë pasi priti Princin bin Salman në Shtëpinë e Bardhë.
“Do të fillojmë të punojmë për Sudanin”, shtoi ai.
Më 4 nëntor, Shtëpia e Bardhë tha se administrata e presidentit Trump është pjesë e një grupi kombesh që kërkojnë t’i japin fund dhunës që ka shkatërruar Sudanin për më shumë se dy vjet e gjysmë. Nuk është e qartë nëse komentet e Trumpit shënojnë një theks të ri në këto përpjekje.
Ushtria sudaneze dhe paraushtarakët e Forcave të Mbështetjes së Shpejtë (RSF) janë përfshirë në një luftë shkatërruese që nga 15 prilli i vitit 2023. Konflikti ka vrarë mijëra njerëz dhe ka zhvendosur miliona të tjerë.
Deri më sot, RSF-ja kontrollon të pesë shtetet e rajonit të Darfurit në Sudanin perëndimor, ndërsa ushtria ka nën kontroll shumicën e 13 shteteve të mbetura në jug, veri, lindje dhe qendër, përfshirë kryeqytetin e Khartoum.
