Ish-presidenti amerikan Donald Trump është paditur për mënyrën si i ka menaxhuar dokumentet e klasifikuara pasi u largua nga Shtëpia e Bardhë.
Trumpi përballet me shtatë akuza, duke përfshirë edhe atë për mbajtjen e paautorizuar të dosjeve të klasifikuara, raporton BBC. Akuzat nuk janë ende publike.
Është padia e dytë ndaj Trumpit dhe padia e parë federale ndaj një ish-presidenti.
Ai po bën fushatë për t’u rikthyer në Shtëpinë e Bardhë në vitin 2024.
Në një postim të tijin, Trump tha se ishte i pafajshëm dhe ishte thirrur të paraqitej në një gjykatë federale në Miami, Florida, të martën pasdite, ku do të arrestohet dhe do të dëgjojë akuzat kundër tij.
“Asnjëherë nuk e kam menduar se ishte e mundur që një gjë e tillë t’i ndodhte një ish-presidenti të Shteteve të Bashkuara”, ka shkruar ai. /koha
