Çavuşoğlu i bëri këto komente në kohën kur anija e parë e ngarkuar me grurë nga Ukraina u nis për në Liban pas inspektimeve në Istanbul
Ministri i Jashtëm turk Mevlüt Çavuşoğlu shprehu shpresë që marrëveshja e drithit e ndërmjetësuar nga Ankaraja do të çojë në një zgjidhje të negociuar për t’i dhënë fund luftës në Ukrainë, raporton Anadolu Agency (AA).
Çavuşoğlu i bëri këto komente në kohën kur anija e parë e ngarkuar me grurë nga Ukraina u nis për në Liban pas inspektimeve në Istanbul.
“OKB-ja parashikon se marrëveshja do të ndihmojë në rinovimin e besimit në tregjet globale të ushqimit dhe do të ulë çmimet. Ne gjithashtu shpresojmë se marrëveshja e fundit do të rrisë shanset për një zgjidhje të negociuar dhe qëllimi ynë është t’i japim fund luftës në Ukrainë. Ne ndiejmë mbështetjen e partnerëve tanë të ASEAN-it në përpjekjet tona drejt këtij qëllimi”, tha Çavuşoğlu në Takimin e Katërt Trepalësh të Partneritetit të Dialogut Sektorial Turqi-ASEAN në Phnom Penh të Kamboxhias.
Turqia, OKB-ja, Rusia dhe Ukraina nënshkruan marrëveshjen historike më 22 korrik për të rihapur tre porte ukrainase – Odesa, Chernomorsk dhe Yuzhny – për drithërat që kanë ngecur për muaj të tërë për shkak të luftës Rusi-Ukrainë, e cila është tani në muajin e gjashtë.
Për të mbikëqyrur eksportet e drithit ukrainas, një qendër e përbashkët koordinimi në Istanbul nisi punën zyrtarisht më 27 korrik, e përbërë nga përfaqësues nga Turqia, OKB-ja, Rusia dhe Ukraina, për të mundësuar transportin e sigurt nga anijet tregtare të mallrave ushqimore komerciale dhe plehrave nga tre portet ukrainase të Detit të Zi.
Çavuşoğlu nënvizoi gjithashtu se Turqia përpiqet të “zhvillojë më tej angazhimin me ASEAN-in” nën iniciativën e saj “Azia Përsëri”.
Kur Ankaraja nisi iniciativën në vitin 2019, tha Çavuşoğlu, Turqia synonte “të përmirësonte më tej marrëdhëniet e saj me Azinë, e cila po bëhet qendra ekonomike e botës, në dimensione të shumëfishta”.
Nisma shihet nga ekspertët si një hap drejt riformësimit të diplomacisë së ardhshme të Turqisë, një vend që shtrihet në të dy kontinentet dhe, siç kishte theksuar Çavuşoğlu në atë kohë, “është një urë midis Lindjes dhe Perëndimit”.
Kamboxhia është kryesuese e ASEAN-it për vitin 2022, ku marrin pjesë Brunei, Kamboxhia, Indonezia, Laosi, Malajzia, Mianmari, Filipinet, Singapori, Tajlanda dhe Vietnami.
ASEAN është një bashkim politik dhe ekonomik i dhjetë shteteve anëtare në Azinë Juglindore, i cili promovon bashkëpunimin ndërqeveritar dhe lehtëson integrimin ekonomik, politik dhe sociokulturor midis anëtarëve të tij në Azi-Paqësor. /aa
