Ministria e Punëve të Jashtme të Turqisë vlerëson se bastisja e Xhamisë Al-Aksa nga qindra izraelitë radikalë, përfshirë ministra, do të “përshkallëzojë më tej tensionet” në rajon, raporton Anadolu.
“Bastisja e Xhamisë Al-Aksa nga qindra izraelitë radikalë, përfshirë ministra, nën mbrojtjen e policisë, është një provokim që shkel statusin historik të Kudsit dhe do të rrisë më tej përshkallëzimin në rajonin tonë”, thuhet në një deklaratë të ministrisë.
Në deklaratë theksohet se “ky akt provokues” tregoi përsëri se Izraeli “nuk ka për qëllim të arrijë paqe”.
MPJ-ja turke i kërkoi komunitetit global të ndërmarrë veprime urgjente për të ndaluar mizoritë e qeverisë izraelite në Gaza dhe për të “parandaluar veprime të tilla që kërcënojnë stabilitetin e të gjithë rajonit tonë”.
Më herët, rreth 2.250 kolonë të paligjshëm izraelitë, si dhe ministri i Sigurisë Kombëtare i ekstremit të djathtë, Itamar Ben-Gvir, kolegu i tij, ministri i partisë Otzma Yehudit, Yitzhak Wasserlauf, si dhe anëtari i Knesset i partisë Likud, Amit Halevi, hynë në kompleks për të përkujtuar Tisha B’Av, një festë hebraike që përkujton disa fatkeqësi në historinë hebraike.
