Ukraina do të rifillojë eksportin e energjisë elektrike në Evropë pas një pauze gjashtëmujore për shkak të sulmeve raketore ruse në infrastrukturën e vendit, njoftoi të premtën në mbrëmje ministri i Energjisë, German Galushchenko.
“Rrjeti energjetik ukrainas ka funksionuar për gati dy muaj pa asnjë kufizim në konsum”, tha Galushchenko duke shtuar se riparimet kishin qenë të suksesshme.
“Eksporti i tepricës së energjisë elektrike do të sigurojë burime financiare shtesë për rindërtimin e infrastrukturës energjetike të shkatërruar dhe të dëmtuar nga lufta”, tha ai.
Ishte rënë dakord për eksportin e një energjie deri në 400 megavat në rrjetin evropian. Ukraina u lidh me rrjetin pak kohë përpara fillimit të luftës.
“Megjithatë, sasia aktuale e energjisë elektrike e eksportuar do të varet nga nevojat e konsumatorëve ukrainas”, tha Galushchenko, duke shtuar se konsumatorët e tyre të energjisë elektrike, padiskutim mbeten prioriteti i tyre.
Përballë pushtimit të gjithanshëm rus për më shumë se 13 muaj, Ukraina ka eksportuar energji elektrike në ish-republikën fqinje sovjetike, Moldavi dhe Bashkimin Evropian nga qershori deri në tetor.
Në vitin 2022, prodhimi i energjisë elektrike në Ukrainë ra me 27% për shkak të luftës.
Centrali më i madh bërthamor në Evropë, në Zaporizhia, i cili ka qenë nën kontrollin rus që nga muaji marsi, u mbyll në shtator. /atsh
