Organizata e OKB-së për Edukim, Shkencë dhe Kulturë (UNESCO) propozoi që qyteti turistik italian i njohur me kanalet dhe gondolat Venediku të përfshihet në “Listën e trashëgimisë botërore në rrezik”, transmeton Anadolu.
Sipas lajmit të CNN, në projektvendimin e paraqitur nga Bordi Këshillimor i UNESCO-s, i është bërë thirrje qeverisë italiane përpara takimit të 45-të të zgjeruar të Komitetit të Trashëgimisë Botërore, të planifikuar për 10-25 shtator në kryeqytetin e Arabisë Saudite, Rijad.
Komiteti i përbërë nga përfaqësues të 21 vendeve, mblidhet një herë në vit dhe rishikon “Listën e trashëgimisë botërore në rrezik”. Në projektvendim i është kërkuar qeverisë italiane të tregojë “përkushtim maksimal” për zgjidhjen e “problemeve të kahershme” në Venedik, i cili ka vite që po përballet me efektet e ngarkesës turistike dhe ndryshimeve klimatike.
Venediku, i cili ka pritur shumë artistë që kanë lënë gjurmë në jetën kulturore dhe artistike evropiane, është duke luftuar me problemet e shkaktuara nga ndryshimet klimatike dhe turizmi vitet e fundit.
Përderisa thatësira e madhe në muajin shkurt në qytet e bëri të pamundur kalimin e gondolave, taksive të ujit dhe ambulancave nëpër disa kanale, disa ndërtesa historike u rrezikuan për shkak të përmbytjes në vitin 2019.
