Më shumë se 30,000 njerëz u larguan nga Libani në Siri në 72 orët e fundit për shkak të përshkallëzimit të konfliktit midis Izraelit dhe Hezbollahut, tha Komisioneri i Lartë i Kombeve të Bashkuara për Refugjatët (UNHCR).
Përfaqësuesi i UNHCR-së në Siri, Gonzalo Vargas Llosa deklaroi se pothuajse gjysma e këtij numri janë fëmijë dhe adoleshentë.
Rreth 80 për qind e tyre janë sirianë që janë kthyer në vendin e tyre dhe pjesa tjetër janë libanezë.
“Këta janë, natyrisht, njerëz që ikin nga bombat dhe kalojnë në një vend që po përballet me krizën dhe dhunën e vet për 13 vjet,” u tha ai gazetarëve në Gjenevë përmes lidhjes video nga kufiri Liban-Siri.
Ai shtoi se Siria po përballet me “kolapsin ekonomik”.
“Unë mendoj se kjo thjesht ilustron se sa të vështira janë zgjedhjet që duhet të bëjnë si sirianët ashtu edhe libanezët,” u shpreh Llosa. /abcnews
