Pavarësisht armëpushimit, ushtria izraelite shënjestroi me artileri dhe helikopterë pjesën jugore të Rripit të Gazës, raporton Anadolu.
Ushtria izraelite vazhdon shkeljet e saj pavarësisht armëpushimit në Gaza, i cili hyri në fuqi më 10 tetor.
Sipas informacioneve të marra nga dëshmitarët, njësitë e artilerisë izraelite shënjestruan në mënyrë intensive zonat lindore të qytetit Rafah, në jug të Rripit të Gazës.
Tymi u ngrit nga zonat e shënjestruara.
Edhe në qytetin Khan Younis në jug të Rripit të Gazës, një helikopter i ushtrisë izraelite hapi zjarr në pjesët lindore të qytetit.
Qeveria palestineze në Gaza njoftoi dje se ushtria izraelite ka shkelur marrëveshjen 591 herë në 50 ditët e para të armëpushimit, i cili hyri në fuqi më 10 tetor dhe se në këto sulme janë vrarë 357 palestinezë ndërsa 903 të tjerë janë plagosur.
